مسلمانوں سے زیادہ غیر مسلم کررہے ہیں آئی ایس آئی کیلئے جاسوسی : دگ وجئے سنگھ

 کانگریس کے سینئر لیڈر اور مدھیہ پردیش کے سابق وزیر اعلی دگ وجے سنگھ نے ایک متنازع بیان دیا ہے ۔ ان کے اس بیان پر سیاسی ہنگامہ آرائی شروع ہوسکتی ہے ۔ ہفتہ کو ایک پروگرام میں دگ وجے سنگھ نے دعوی کیا کہ انٹر سروسز انٹلی جنس ( آئی ایس آئی ) کیلئے آج کے وقت میں مسلمان سے زیادہ غیر مسلم جاسوسی کرتے ہیں ۔

نیوزی ایجنسی اے این آئی کے مطابق کانگریس جنرل سکریٹری دگ وجے سنگھ نے کہا کہ بجرنگ دل ، بھارتیہ جنتا پارٹی ( بی جے پی ) آئی ایس آئی سے پیسہ لے رہی ہے ، اس پر توجہ دینے کی ضرورت ہے ۔ مسلمانوں سے زیادہ غیر مسلم پاکستان کی آئی ایس آئی کیلئے جاسوسی کررہے ہیں ، اس کو ہمیں سمجھنا چاہئے ۔  ریاست کے بھینڈ ضلع میں ایک پروگرام میں بولتے ہوئے دگ وجے سنگھ نے ملک کی معیشت کو لے کر بھی مودی حکومت پر نشانہ سادھا ۔ انہوں نے کہا کہ اس حکومت میں معیشت خراب ہورہی ہے ، نوکریاں بھی نہیں ہیں ، حکومت اپنی ناکامیوں کو چھپانے کیلئے آر بی آئی سے فنڈ لے کر کام کررہی ہے ۔ حکومت کو سب کچھ چھوڑ کر فی الحال معیشت پر توجہ دینے کی ضرورت ہے  ۔